Трките во Формула 1 ќе бидат хаотични!

Формула 1 влегува во нова ера со целосно променети правила – нови мотори, шасија, гориво и гуми, како и управувањето со енергијата на батериите ќе играат централна улога.

Хибридните системи сега обезбедуваат значително поголем дел од вкупната моќност на моторот.

• Ќе видите повеќе хаос на трките, каде што возачот мора да биде многу посвесен за сите различни ситуации што можат да се случат. Тоа ќе се случува преку целата година. Ќе има поголем акцент на способноста на возачот да ги контролира сите тие фактори, рече Британецот.

Возачот на Мекларен нагласи дека новото „копче за зголемување“, кое обезбедува дополнителен наплив на електрична енергија, и неговото влијание врз состојбата на батеријата, ќе бидат клучни за новата Ф1 сезона.

• Ќе можете да ги принудите ривалите на грешки на различни позиции и да креирате трки на начини што не беа можни порано, објасни Норис.

Норис ги темели своите први впечатоци од тестирањата одржани минатата недела во Барселона, додека уште два тридневни предсезонски тестови ќе се одржат во Бахреин во следните две недели, почнувајќи од 11 февруари. Според него, новите правила би можеле да доведат до почести промени на позициите на патеката.

• Ќе видите повеќе „јо-јо“ ситуации, повеќе напади со дополнителна брзина. Но, тогаш тој возач ќе мора да се брани повеќе од порано, што повторно создава поголем хаос – и тоа е одлично за гледачите, додаде Норис.

Болидите сега се помали и полесни, со помалку притисок и активна аеродинамика – предните и задните крила се отвораат на правците за поголема брзина и подобро обновување на енергијата.

• Новиот болид сигурно се чувствува помоќен и побрз на правците. Најголемиот предизвик во моментов е управувањето со батеријата и разбирањето како најдобро да се користи, порача Норис.

Норис ја освои својата прва титула минатата година. Тој инсистира дека сè уште ужива во остварувањето на својот „животен сон“.

• Ако не освојам ништо друго, секогаш ќе имам нешто на што ќе бидам исклучително горд. Минатата сезона беше фантастична за мене – и секако сакам да го направам тоа повторно, рече 26-годишникот.

Новата сезона во Ф1 започнува на 8 март со Големата награда на Австралија во Мелбурн.