САД и Кина денеска ги продолжија преговорите за царини, но имаат различни ставови за моменталната фаза од преговорите.
Американскиот претседател Доналд Трамп на социјалните мрежи напиша дека се постигнува „голем напредок“, па дури и навести дека е можно „тотално ресетирање“. Тој не соопшти повеќе детали.
Разговорите започнаа вчера во Женева и продолжуваат денеска, потврдија официјални лица за АП под услов да останат анонимни.
Пекинг сè уште не коментираше директно, но неговата официјална новинска агенција зазеде цврст став, велејќи дека Кина „цврсто ќе го отфрли секој предлог што ги загрозува основните принципи или ја поткопува пошироката цел за глобална еднаквост“.
Разговорите би можеле да помогнат во стабилизирање на глобалните пазари потресени од ќор-сокакот меѓу Соединетите Држави и Кина, што ги остави бродовите во пристаништето со стоки од Кина да не сакаат да растовараат додека не го добијат последниот збор за царините. Разговорите се одвиваат во тајност и ниту една од страните не даде изјави за новинарите додека си заминаа вчера.
Трамп минатиот месец ги зголеми американските царини за Кина на 145%, а Кина возврати со таргетирање на американскиот увоз со данок од 125%. Ваквите високи царини во суштина претставуваат бојкот на меѓусебните производи, што ја наруши трговијата која надмина 660 милијарди долари минатата година.
