Третина од собраните средства ќе бидат донирани на жените жртви на семејно насилство

По повод глобалната кампања „16 дена активизам против насилство врз жени и девојчиња“, Општина Кисела Вода продолжува активно да ја промовира свеста за превенција, едукација и институционална поддршка преку културни и општествени настани кои испраќаат силна и јасна општествена порака.

Во таа насока, во Домот на култура „Билјана Беличанец“ во Кисела Вода, викендот се одржа театарската претстава „Кротка“, која преку уметничкиот израз отвора значајни прашања за положбата на жената, личната сила, достоинството и неопходноста од поддршка од заедницата и институциите.

– Настанот беше збогатен и со хуманитарен базар во фоајето на Домот на културата, на кој жителки на општината и членки на здруженија ги изложија своите рачни изработки, а 30 % од собраните средства ќе бидат донирани на жените жртви на семејно насилство – информираат од Општина Кисела Вода.

Градоначалничката на Општина Кисела Вода, Бети Стаменкоска-Трајкоска нагласи дека овие 16 дена се потсетник дека како општество имаме постојана обврска да градиме систем во кој секоја жена и секое девојче се чувствуваат безбедно, почитувано и охрабрено.

– Превенцијата и едукацијата мора да одат заедно со силна, достапна и функционална институционална поддршка. Културата, како што е оваа театарска претстава, има моќ да отвори дијалог, да допре до емоциите и да нè мотивира на заедничка одговорност и солидарност. Општина Кисела Вода останува посветена на создавање средина во која грижата, поддршката и почитта се темелни вредности и затоа и понатаму ќе вложуваме во активности, програми и партнерства кои ја зајакнуваат улогата на институциите, ја унапредуваат едукацијата и придонесуваат кон поголема свесност и поддршка за жените и за девојчињата во нашето општество – изјави Стаменкоска-Трајкоска.

Општина Кисела Вода е прва во Град Скопје што, како дел од сетот системски мерки, спроведе јавен повик за директна финансиска поддршка на жени погодени од семејно насилство, со јасна определба континуирано да обезбедува помош и нивна поддршка.