Трета среќа за Њукасл, тргнува по словенечката ѕвезда

Пред враќањето во Лигата на шампионите, екипата на Њукасл веќе потроши 52 милиони евра за Антонио Еланга, експлозивното крило кое одговара на нивната игра, но вистинското прашање е кој ќе биде во напаѓачката линија?

Александар Исак e наводно незадоволен, а обидите да се доведат Уго Екетике и Жоао Педро завршија, првиот потпиша за Ливерпул, другиот за Челзи.

Сега, почна да се врти името Бенџамин Шешко (22 години), кој и претходно се споменуваше како евентуален трансфер.

Шешко не е обичен плејмејкер. Висок е 195 сантиметри, силен во дуел, но далеку од статичната „деветка“ што би можела да ја сугерира неговата висина. Неговиот профил е хибриден – способен е да трча во простор, да предводи во контра напади, лесно дрибла, се повлекува во средниот ред и учествува во градењето на нападот.

Неговите бројки во споредба со другите напаѓачи од седумте најсилни европски лиги зборуваат за разновидност и рамнотежа во играта без топката. Сепак, Лајпциг беше далеку од уверлив минатата сезона, па затоа и Шешко запиша само 13 гола во Бундеслигата. Неговиот шут, исто така, не треба да се занемари. Три гола надвор од шеснаесетникот, вклучувајќи го и спектакуларниот против Баерн со надворешната страна на стапалото. Но, можеби уште подобар пример беше ракетата против Вердер Бремен – топката удри во пречката пред голманот да може да реагира. Шешко има способност да создаде гол дури и кога шансата не е голема. Сепак, има и една голема мана – финишот еден на еден сè уште не е на посакуваното ниво!

И покрај се, Шешко останува еден од најефикасните млади напаѓачи во Европа. Неговите физички предиспозиции, во комбинација со неговиот шут и способноста да игра во двата правци, со и без топка, го прават речиси уникатен профил.

Од друга страна, Исак е пософистициран, технички поисполиран, но Шешко е физички подоминантен. Неговото доаѓање би можело да му понуди на Њукасл нова димензија – подиректен пат до голот, без губење на квалитетот. И на само 22 години, тој сè уште е во подем.

Доколку Њукасл одлучи да се движи во оваа насока – и ако му обезбедат простор што му одговара – Бенџамин Шешко би можел да стане следното големо засилување на „Сент Џејмс парк“.