Американскиот претседател Доналд Трамп во саботата остро ги критикуваше обвинителите во Израел во врска со судењето за корупција со кое се соочува израелскиот премиер Бенјамин Нетанјаху. Тој рече дека САД „нема да го толерираат тоа“. Тие му дадоа на Израел милијарди долари помош, објави Ројтерс.
Нетанјаху негира сè за што е обвинет, а тој беше обвинет во Израел во 2019 година за поткуп, измама и злоупотреба на довербата. Судењето трае од 2020 година.
Судот во петокот го отфрли барањето за одложување на сведочењето на Нетанјаху за две недели поради дипломатски и безбедносни проблеми по 12-дневниот конфликт меѓу Израел и Иран овој месец.
Трамп се огласи за ситуацијата на платформата Truth Social. Тој тврди дека судскиот процес ќе ја попречи способноста на Нетанјаху да води преговори со Хамас и Иран.
„Ужасно е тоа што му го прават на Биби Нетанјаху во Израел. Тој е воен херој и премиер кој заврши фантастична работа работејќи со Соединетите Американски Држави за да постигне голем успех во елиминирањето на опасната нуклеарна закана од Иран. Поважно е што тој моментално води преговори со Хамас, кои вклучуваат и враќање на заложниците. Како е можно да го принудат премиерот на Израел да седи во судница цел ден — за НИШТО (пури, плишана играчка, итн.)? Тоа е ПОЛИТИЧКИ ЛОВ НА ВЕШТЕРКИ, многу сличен на оној што морав да го издржам. Оваа пародија на „правда“ ќе ги попречи преговорите и со Иран и со Хамас. Со други зборови, ТОТАЛНО ЛУДО е она што овие надвор од контрола обвинители му го прават на Биби Нетанјаху. Соединетите Американски Држави трошат милијарди долари секоја година – многу повеќе од која било друга земја – за заштита и поддршка на Израел. Ние тоа нема да го толерираме. Тукушто имавме голема победа со премиерот Биби Нетанјаху на чело – и сега таа победа сериозно се оцрнува. „ПУШТЕТЕ ГО БИБИ, ТОЈ ИМА ДА ЗАВРШИ ГОЛЕМА РАБОТА“, напиша Трамп.
Портпаролот на канцеларијата на израелскиот обвинител не сакаше да коментира за објавата на Трамп, но Нетанјаху се огласи на платформата X. Тој ја сподели објавата на Трамп и му се заблагодари. „Заедно ќе го направиме Блискиот Исток повторно голем“, напиша Нетанјаху.
