Американскиот претседател Доналд Трамп објави дека носењето маски на протестите повеќе нема да биде дозволено и ги пофали постапките на Националната гарда за време на немирите во Лос Анџелес.
„Овие протести од радикалната левица, од поттикнувачи и честопати платени предизвикувачи на проблеми, нема да бидат толерирани. Исто така, маските повеќе нема да бидат дозволени на протестите. Што имаат овие луѓе да кријат и зошто? Уште еднаш, благодарам на Националната гарда за добро завршената работа“, објави Трамп на мрежата Truth Social.
Тој додаде дека Националната гарда одлично ја завршила работата во Лос Анџелес по два дена насилство, конфликти и немири.
Во овој град во последните неколку дена се одржуваат протести поради рациите против имигрантите.
„Имаме некомпетентен гувернер (Гевин Њусом) и градоначалничка (Карен Бас) кои, како и обично, (само погледнете како се справија со пожарите) беа бавни и дозволија да се случи оваа катастрофа. Повеќе нема федерално овластување за ова. Тие не беа дораснати на задачата“, напиша Трамп, пренесува Срна.
