Трамп воведува дополнителни царини од 100% за Кина

Американскиот претседател Доналд Трамп најави воведување дополнителни царини од 100% за увоз од Кина, обвинувајќи го Пекинг за заземање „исклучително агресивен став“ во трговските односи.

Во објава на неговата социјална мрежа Truth Social, Трамп рече дека Кина испратила „исклучително непријателско писмо до светот“ и вовела „големи извозни контроли на речиси секој производ што го произведува“.

Трамп предупреди дека новите царини ќе стапат на сила на 1 ноември и најави дека САД ќе воведат и извозни контроли на својот клучен софтвер за Кина.

„Невозможно е да се верува дека Кина би презела таква акција, но тие го сторија тоа“
„Врз основа на фактот дека Кина ја зазеде оваа невидена позиција и зборувајќи само за САД, а не за други земји кои се слично изложени на ризик, почнувајќи од 1 ноември 2025 година (или порано, во зависност од понатамошните дејствија или промени преземени од Кина), Соединетите Американски Држави ќе воведат царина од 100% за Кина, покрај сите царини што моментално ги плаќа“, напиша Трамп.

„Невозможно е да се поверува дека Кина би презела таква акција, но тие го направија тоа, а останатото е историја“, додаде тој.

Порано денес, Трамп се огласи на социјалните мрежи за да го нападне кинескиот лидер Си Џинпинг поради зголемените напори на Кина да воведе контрола на извозот на клучните ретки минерали. Тој се закани со економски контрамерки и рече дека повеќе не гледа причина да се сретне со Си за време на планираната посета на регионот подоцна овој месец.

Во тоа време, Трамп, исто така, се закани со економски санкции против Кина: „Во зависност од тоа што Кина ќе каже за непријателската „одлука“ што штотуку ја донесоа, ќе бидам принуден, како претседател на Соединетите Американски Држави, финансиски да возвратам на нивниот потег“.

„За секој елемент што успеаја да го монополизираат, имаме два“, додаде тој.

Вчера, Пекинг ги зајакна широките ограничувања за извоз на ретки минерали и го прошири списокот на минерали под контрола. Тој, исто така, воведе ограничувања поврзани со нивните технологии за производство и нивната употреба во странство, вклучително и за воени и полупроводнички цели. Овој потег беше насочен кон сериозна ранливост во Соединетите Американски Држави – онаа што поттикна значителни напори во последните месеци од страна на администрацијата на Трамп за идентификување и брзо зголемување на капацитетот за рударство и производство.

Според неколку претставници на администрацијата, овој потег веднаш предизвикал тревога во администрацијата на Трамп.

Потегот се случил во време кога Пекинг се обидувал да ја зголеми својата моќ во трговските разговори со САД и пред очекуваната средба меѓу Си и Трамп на маргините на самитот на АПЕК во Јужна Кореја подоцна овој месец.

Некои претставници на администрацијата го сметале ова за јасен обид на Си да обезбеди преговарачка предност пред планираната средба лице в лице со Трамп, додека други посочиле на мерките за контрола на извозот на САД што можеле да предизвикаат кинески одговор.