Tрамп воведе санкции врз членовите на семејството и соработниците на венецуелскиот претседател Мадуро

САД денес воведоа санкции врз членовите на семејството и соработниците на венецуелскиот претседател Николас Мадуро и неговата сопруга, објави Министерството за финансии на САД.

Во соопштението се вели дека санкциите се воведени врз седум лица за кои се тврди дека се поврзани со Мадуро и неговата сопруга, јавува агенцијата.

Министерот за финансии Скот Бесант ги обвини за „одржување на нарко-државата на Мадуро“.

„Нема да дозволиме Венецуела да продолжи да ја поплавува нашата земја со смртоносни дроги“, рече Бесант.

Тој рече дека Мадуро и неговите криминални соучесници се закана за мирот и стабилноста на Америка.

„Администрацијата на Трамп ќе продолжи да ги таргетира мрежите што го поддржуваат неговиот нелегитимен режим“, рече тој.

Венецуелското министерство за информации не одговори на барањето за коментар.

Мадуро и неговата влада жестоко негираа какви било врски со криминалот и велат дека САД се обидуваат да наметнат промена на режимот со цел да ја преземат контролата врз огромните резерви на нафта во Венецуела.

Одлуката доаѓа во време кога американскиот претседател Доналд Трамп го засилува притисокот врз Мадуро, води кампања за негово отстранување и гради масовно воено присуство во јужниот дел на Карибите.

Администрацијата на Трамп нападна бродови за кои се сомнева дека шверцуваат дрога во регионот, заплени санкциониран танкер покрај брегот на Венецуела и прогласи „блокада“ на сите санкционирани танкери што влегуваат и излегуваат од Венецуела.

Трамп, исто така, постојано најавуваше дека наскоро ќе има копнени напади врз Венецуела.

Санкциите што ги воведоа САД денес се насочени кон роднините на Карлос Ерик Малпика Флорес, внук на сопругата на Мадуро, за кого САД тврдат дека учествувал во корупциска завера во државната нафтена компанија и кого Вашингтон го санкционираше минатата недела.

Неговата мајка, сестрата на сопругата на Мадуро, таткото, сестрата, сопругата и ќерката се исто така погодени од санкциите.