Американскиот претседател Доналд Трамп вети дека ќе им исплати на Американците поврат на царини од 2.000 долари уште следната година, зголемувајќи ги надежите за финансиска инјекција за милиони граѓани кои се борат да ги задоволат трошоците за живот.
„Собираме стотици милијарди долари царински давачки. Ќе даваме дивиденди… веројатно во средината на следната година, во износ од илјадници долари за лица со умерени и средни приходи“, објави Трамп. Но, и покрај уверенијата на претседателот, експертите предупредуваат на огромни, можеби непремостливи пречки што стојат на патот на тоа ветување, пишува CNN.
Најголемата пречка за планот на Трамп е едноставната математика. Иако царините носат значителни приходи во државната каса – според проценките на Даночната фондација, тоа се 158,4 милијарди долари во 2025 година и дополнителни 207,5 милијарди долари во 2026 година – тоа не е ни приближно доволно за да се покријат трошоците за исплата на дивиденди.
Даночната фондација анализираше три можни модели на плаќање, од кои секој би чинел повеќе од вкупните приходи од царините. На пример, дури и најскромното сценарио, кое би ги опфатило само даночните обврзници со приходи до 100.000 долари, би чинело речиси 280 милијарди долари.
Тоа е за 121 милијарда долари повеќе од проектираните приходи за оваа година. Најскапата опција, која би ги вклучила сите граѓани, сопружници и издржувани лица, би достигнала неверојатни 607 милијарди долари.
Друг проблем е што администрацијата на Трамп веќе ги одвоила приходите од царини за покривање на трошоците за други даночни и буџетски ставки. „Ова е како магично дрво за пари кон кое се обраќате секогаш кога ви требаат пари. Се разбира, тоа не е реалност“, живописно објасни Скот Линсиком од Институтот Като.
