Американскиот претседател Доналд Трамп изјави дека средбата меѓу рускиот претседател Владимир Путин и неговиот украински колега, Володимир Зеленски, е малку веројатна и дека можеби ќе бидат потребни американски авиони за да ѝ помогнат на Европа да ја заврши војната.
– Ќе се случи трилатерална средба, билатерална – не знам. Понекогаш луѓето не се подготвени за тоа. Користам аналогија. Имате дете, а друго дете е на игралиштето. Тие се мразат еднo со друго и почнуваат да се тепаат. Сакате да престанат, но тие продолжуваат. По некое време сакаат да престанат. Понекогаш мора малку да се борат пред да можете да ги натерате да престанат. Но, тоа се случува веќе долго време. Многу луѓе загинаа – рече Трамп во интервју за американскиот весник „Дејли колер“.
Тој додаде дека е подготвен да помогне со безбедносни гаранции, дури и ако тоа вклучува воздушна поддршка од САД за да се запре војната.
