„Трамп треба да воведе претплата за НАТО – без претплата нема членство“, смета Бен Валас

Поранешниот британски министер за одбрана Бен Валас изјави во понеделникот дека американскиот претседател Доналд Трамп треба да „пресече“ и да го направи НАТО организација базирана на претплата.

Тој рече дека на сојузниците треба да им се дозволи да се приклучат само ако потрошат 3,5 отсто од својот национален приход за одбрана до 2030 година.

„Без претплата – нема членство. Без 3,5 проценти од БДП до 2030 година – нема заштита од чичко Сем… Време е Трамп да преземе одговорност и да преземе акција. Тоа нема да биде само во интерес на Америка, туку и во наш“, напиша Валас во авторски текст за „Тајмс“ пред овонеделниот самит на НАТО во Хаг.

Тој повикувајќи се на изјави од високи претставници на одбраната и разузнавањето со кои разговарал во Вашингтон, истакна дека Трамп ќе го напушти НАТО во рок од две години, освен ако Велика Британија и Европа не потрошат повеќе за одбраната.

„Значи, подобро е да преземеме чекори за да го спречиме тоа или да се подготвиме да се случи. Да не правиме ништо и да се плеткаме со бројките не е опција“, напиша тој. Германија премина од зборови на дела, како и Полска и балтичките земји. Британија го губи своето лидерство и кредибилитет. Висок адмирал во НАТО ми рече: „Посакувам Британија да престане да пишува чекови што не може да ги наплати“, мислејќи на редовните ветувања на Обединетото Кралство да прави работи што очигледно не може“, напиша поранешниот британски министер.

Тој додаде дека Трамп треба да го заснова НАТО на основа на претплата за да се осигура дека сите сојузници „придонесуваат за нашата сила“.

„Значи, како што се приближуваме до овогодинешниот самит на НАТО, мораме да се погрижиме тоа никогаш да не се случи и дека Британија и Европа конечно ги послушаат десетгодишните предупредувања од Белата куќа дека САД чувствуваат дека се „земени здраво за готово““, нагласи Валас.

Според него, чудна иронија е што поранешниот претседател Барак Обама и сегашниот претседател на САД веројатно се согласија само за едно – а тоа е дека Европа треба да се вклучи и да финансира многу повеќе од својата одбрана.

„Претседателот Обама убаво праша, а претседателот Трамп праша на единствениот начин како што знае Доналд: отворено“, рече Валас, кој беше секретар за одбрана на Обединетото Кралство од 2019 до 2023 година.