Трамп: Точно знам што правам

Претседателот на Соединетите Американски Држави, Доналд Трамп, денес изјави дека завршил шест војни за шест месеци, но дека мора да слуша многу луѓе кои му велат дека го прави тоа погрешно.

„Знам точно што правам. Завршив шест војни за шест месеци, една од нив потенцијална нуклеарна катастрофа, а сепак морам да читам и слушам „Волстрит џурнал“ и многу други кои навистина немаат поим, велејќи ми дека сè што правам е погрешно во врска со руско-украинскиот хаос, кој е војна на заспаниот Џо Бајден, а не мојата“, напиша тој на мрежата Truth Social.

Како што рече, тој е таму само за да ги запре конфликтите, а не да ги продлабочи.

„Тоа никогаш немаше да се случи ако јас бев претседател. Знам точно што правам и не ми требаат совети од луѓе кои со години работат на сите овие конфликти и никогаш не успеале да ги спречат“, нагласи Трамп.

Како што изјави, тие се глупави луѓе, без здрав разум, интелигенција или разбирање и само го отежнуваат решавањето на сегашната катастрофа меѓу Русија и Украина.

„И покрај сите мои површни и многу завидливи критичари, ќе го поправам тоа – секогаш го правам тоа“, рече американскиот претседател.

Тој изјави дека е апсолутно убеден дека ако Русија крене раце и каже: „Се откажуваме, го признаваме поразот, се предаваме, им ги даваме на Украина и на големите Соединети Американски Држави, најпочитуваната и најмоќната земја досега, Москва и Санкт Петербург и сè што ги опкружува во радиус од илјада милји“, лажните медиуми и нивните демократски партнери би рекле дека тоа е лош и понижувачки ден за Доналд Џ. Трамп, еден од најлошите денови во историјата на нашата земја.