Трамп: Шпанија има нулта контрола врз своите граници, ќе ја уништи Европа

Претседателот на САД, Доналд Трамп, денес ја критикуваше Шпанија, обвинувајќи ја дека нема контрола врз своите граници, додека шпанскиот премиер Педро Санчез ги отфрли тврдењата дека постојат цврсти докази дека Мароко го организирал масовниот прилив на мигранти во Сеута, шпанска енклава во Северна Африка.

„Толку е тажно она што се случува во Шпанија, земја која има нулта гранична контрола“, напиша Трамп во објава на неговата социјална мрежа „Трут соушал“ (Truth Social).

Трамп претходно ја критикуваше Шпанија, членка на НАТО, за нејзиниот став кон прашањето за мигрантите.

Во изјава за британскиот телевизиски канал GB News, Трамп ја опиша ситуацијата во Шпанија како „скандал“ и предупреди дека последиците би можеле да се прошират надвор од таа земја.

Претседателот на САД процени во тоа време дека мигрантите што влегуваат во Шпанија ќе го продолжат своето патување кон други европски земји.

„Тие ќе ја уништат Европа, бидејќи откако ќе влезат во Шпанија, нема да застанат во Шпанија. Ќе се влеваат во вашата земја и во секоја друга земја, но веќе се влеваат во вашата земја“, рече Трамп.

Во исто време, Санчез рече дека „нема цврсти докази“ дека Мароко го организирал приливот на мигранти во Сеута.

Санчез, обраќајќи се пред парламентот, рече дека ниедна полициска, судска или меѓународна институција не ѝ доставила на шпанската влада докази дека Мароко го планирал или извршил инцидентот.

Неговата изјава дојде откако извештајот на шпанската полиција го доведе во прашање одговорот на мароканските безбедносни сили.

Извештајот, добиен од медиумите, го опиша одговорот на мароканската полиција како „целосна попустливост“, оценувајќи дека таков пристап овозможил масовно прилив на мигранти.

Во извештајот, исто така, се наведува дека бројот на марокански полицајци во близина на граничниот премин бил „јасно помал од вообичаеното“ и дека полицијата не направила „сериозен обид“ да го запре приливот.

Мароко, сепак, негираше дека имало олабавување на контролата на копнениот граничен премин, додека Министерството за внатрешни работи таму го припиша ненадејниот прилив на мигранти на „злонамерна злоупотреба“ на социјалните мрежи и ширење на погрешни информации, пренесува „Танјуг“.