Трамп се заканува дека ќе ѝ го одземе државјанството на комичарката Роузи О’Донел

Претседателот на Соединетите Американски Држави, Доналд Трамп, се закани дека ќе ѝ го одземе државјанството на САД на актерката и комичарка Роузи О’Донел поради нејзиното наводно преселување во Ирска.

„Бидејќи Роузи О’Донел не е во најдобар интерес на нашата Голема Нација, сериозно размислувам да ѝ го одземам државјанството“, рече Трамп во објава на неговата социјална мрежа Truth Social, опишувајќи ја како закана за човештвото и велејќи дека треба да остане во Ирска, објави денес „Фокс њуз“.

О’Донел брзо одговори со објави на социјалните медиуми, во кои остро го критикуваше Трамп, а во една објава на Инстаграм сподели колаж од фотографии, вклучувајќи и снимка од екранот од пораката на Трамп, со пораката дека Трамп ѝ штети на Америка.

„Претседателот на Соединетите Американски Држави отсекогаш го мразел фактот што го гледам таков каков што е, криминалец, измамник, сексуален насилник и лажго кој ѝ штети на нашата земја за своја лична корист“, напиша О’Донел, објаснувајќи дека отишла во Ирска затоа што Трамп е „опасен, бездушен старец, дементен, на кого му недостасува емпатија и основна човечност“.

О’Донел, како што објави „Фокс њуз“, во една од своите објави сподели фотографија од Трамп со Џефри Епштајн, контроверзниот финансиер кој почина во затвор во 2019 година додека чекаше судење по обвинение за трговија со малолетници.

„Вие ме нарекувате закана за човештвото, а јас сум сè од што се плашите: гласна жена, геј жена, мајка која ја кажува вистината и Американка која замина пред вие да запалите сè“, рече О’Донел.

О’Донел и Трамп се во јавен конфликт од 2006 година, кога комичарот го критикуваше во емисијата „The View“ за неговата толеранција кон тогашниот американски амбасадор кој беше вмешан во неколку контроверзии, за што Трамп потоа ја нарече „вистински губитник“, пренесува „Танјуг“.