Трамп призна: Користам шминка, но сум „совршено“ здрав

Американскиот претседател Доналд Трамп изјави дека е во „совршена“ здравствена состојба, зема повеќе аспирин отколку што препорачуваат лекарите, користи шминка за да ги покрие модринките на рацете и не вежба редовно затоа што му е здодевно.

Во опширно интервју за неговото здравје, Трамп изјави за „Волстрит џурнал“ дека бил подложен на компјутерска томографија во октомври, откако претходно погрешно тврдеше дека имал подетална магнетна резонанца, објави Би-би-си.

Трамп (79) е најстариот претседател некогаш инаугуриран во историјата на САД, а неговото здравје и возраст се повеќе се предмет на јавна критика, според британскиот медиум.

Тој ги негираше тврдењата дека има проблеми со слухот или дека заспал во Белата куќа.

Весникот наведува дека Трамп „покажал иритација поради јавната дебата за неговото здравје“.

„Ајде повторно да разговараме за здравјето, по 25-ти пат“, рече американскиот претседател на почетокот на она што весникот го нарече „непланиран телефонски разговор“ додека весникот подготвуваше статија за неговото здравје.

Трамп рече дека веќе 25 години зема повисоки дози аспирин од препорачаните, иако призна дека тоа му предизвикува полесни модринки.

„Велат дека аспиринот е добар за разредување на крвта, а јас не сакам густа крв да ми тече низ срцето“, рече Трамп.

Тој зема 325 милиграми аспирин дневно, наместо 81 милиграм што ги препорачуваат лекарите.

„Тие би сакале да земам помала доза“, рече Трамп, додавајќи дека не сака да ја промени својата навика по толку години бидејќи е малку суеверен.

Според упатствата на клиниката Мајо, ризикот од срцев удар и мозочен удар се зголемува со возраста, а ниските дози на аспирин можат да помогнат во спречувањето со разредување на крвта и спречување на згрутчување на крвта.

Сепак, клиниката предупредува дека ризикот од крварење од аспирин се зголемува со возраста, наведувајќи дека дневната терапевтска доза е помеѓу 75 и 325 милиграми.

Трамп, исто така, зборуваше за медицинско скенирање извршено во Националниот воено-медицински центар „Волтер Рид“, за кое претходно рече дека е магнетна резонанца.

Откако му била дијагностицирана хронична венска инсуфициенција, честа кај постарите лица, му било советувано да носи компресивни чорапи, но тој одбил.

„Не ми се допаѓаа“, рече Трамп, додавајќи дека сега почесто станува од своето биро, што го намалило отокот во нозете.

Претседателот на САД рече дека сè уште не сака никаква форма на редовно вежбање, освен голф.

„Едноставно не ми се допаѓа. Досадно е. Одењето или трчањето на лента за трчање со часови, како што прават некои луѓе, тоа не е за мене“, рече Трамп.

Тој повтори дека не заспива за време на состаноците, велејќи дека понекогаш ги затвора очите затоа што тоа го опушта.

Што се однесува до модринките на неговите раце видливи на некои фотографии, тој рече дека сега користи шминка за такви ситуации.

„Имам шминка што е лесна за нанесување, потребни се околу 10 секунди“, рече тој.

Трамп рече дека нема проблеми со слухот и додаде дека фотографиите на кои изгледа како да спие понекогаш се направени кога трепка.

„Понекогаш ме фотографираат кога трепкам. И ме фаќаат токму тогаш“, истакна Трамп.