Трамп предложи републиканците да ги „национализираат“ изборите, наспроти Уставот според кој изборите ги спроведуваат државите

Американскиот претседател, Доналд Трамп, предложи  републиканците да ги „национализираат“ изборите, продолжувајќи да промовира неосновани теории на заговор за наводна измама на гласачите на претседателските избори во 2020 година. Неговиот предлог, кој е во спротивност со Уставот на САД, според кој избори спроведуваат државите, доаѓа помалку од една недела откако ФБИ изврши рација во изборна канцеларија во Џорџија, пишува „Политико“.

– Републиканците треба да кажат: Сакаме да преземеме контрола. Треба да преземеме контрола врз гласањето на најмалку 15 места. Републиканците треба да го национализираат гласањето, рече Трамп во поткаст што го водеше поранешниот заменик-директор на ФБИ, Ден Бонгино.

Претседателот постојано инсистира дека ги добил изборите во 2020 година со „огромно мнозинство“, тврдејќи без докази дека луѓето „гласале нелегално“ на тие избори. Тој, исто така, се осврна на рацијата на ФБИ во округот Фултон, Џорџија, алудирајќи дека „некои интересни работи ќе произлезат од таа држава“. Но, десетици правни оспорувања на резултатите од изборите во 2020 година не успеаја да обезбедат веродостојни докази за широко распространета измама. И државната ревизија и пребројувањето, побарано од изборниот штаб на Трамп, ја потврдија победата на поранешниот претседател Џо Бајден во Џорџија.

Последниве месеци, Трамп ги засили напорите да ги поткопа резултатите од изборите во 2020 година, ветувајќи во јануари дека „луѓето наскоро ќе бидат гонети за она што го направиле“ во врска со изборите. Неговото Министерство за правда, исто така, тужеше околу дваесетина држави, барајќи пристап до нивните списоци на гласачи. Најновата закана за национализација на гласањето го повторува неговото ветување од минатото лето да потпише извршна наредба за да обезбеди „фер“ на среднорочните избори во 2026 година. „Запомнете, државите се само агенти на федералната влада во броењето и пребројувањето на гласовите. Тие мора да го прават она што им го кажува федералната влада, претставена од претседателот на Соединетите Американски Држави, ЗА ДОБРОТО НА НАШАТА ЗЕМЈА“, напиша тој во објава на социјалните мрежи во август.

Трамп никогаш не потпишал таква наредба, а Белата куќа сè уште не разјаснила како би се имплементирал таков потег во согласност со Уставот. Посебната извршна наредба што Трамп ја потпиша во март, со цел додавање доказ за државјанство во националниот формулар за регистрација на гласачи и промена на процедурите за гласање по пошта, во голема мера беше блокирана од федералните судии, иако нејзината конечна судбина останува неизвесна.