Трамп потпиша: Марихуаната повеќе не е меѓу најопасните дроги во САД

Американскиот претседател Доналд Трамп денес потпиша извршна наредба со која марихуаната на федерално ниво се прогласува за помалку опасна дрога што би можела да има медицинска вредност.

Марихуаната одамна е легална во многу држави, но на федерално ниво е во првата категорија на најопасни дроги, како хероинот, а сега ќе биде преместена во третата категорија, каде што се, на пример, анаболните стероиди и кетаминот, објавува Политико.

Дури и по оваа регулатива, која треба да ја формализира државниот обвинител Пам Бонди, марихуаната ќе остане контролирана супстанца што повеќето луѓе не смеат да ја поседуваат според федералниот закон, но овој потег би можел да поттикне повеќе истражувања и да обезбеди даночни олеснувања за компаниите што се фокусираат на добрите страни на канабисот.

„Луѓето ме молат да го направам ова. Со децении, ова го бараат американски пациенти кои страдаат од екстремна болка, неизлечиви болести, агресивни видови на рак, нарушувања, невролошки проблеми и друго, вклучувајќи бројни ветерани кои живеат со хронични медицински состојби кои сериозно им го нарушиле квалитетот на живот“, рече Трамп при потпишувањето на наредбата, опкружен со здравствени службеници, вклучувајќи го и секретарот за здравство и социјални услуги Роберт Ф. Кенеди Џуниор.