Трамп: Нема да толерирам одлагање од страна на Хамас

Доналд Трамп коментираше за тековните напори за спроведување на неговиот мировен план во нова објава на мрежата Truth Social.

„Го ценам привременото запирање на бомбардирањето од страна на Израел за да му се даде шанса на Договорот за ослободување на заложниците и мир“, напиша тој.

Тој го повика Хамас да „дејствува брзо“, заканувајќи се со ултиматум дека во спротивно „сите опции ќе бидат отворени“.

„Нема да го толерирам одложувањето, за кое многумина веруваат дека ќе се случи, ниту каков било исход каде што Газа повторно ќе биде закана. Ајде да завршиме со ова, БРЗО. Сите ќе бидат третирани праведно“, напиша тој.

Преку ноќ, американскиот претседател му нареди на Израел да „престане со бомбардирањето на Газа“ откако Хамас објави дека ќе ги ослободи преостанатите израелски заложници.

Потоа, Бенјамин Нетанјаху вети дека ќе ја спроведе првата фаза од мировниот план на Трамп, што вклучува запирање на бомбардирањето и ослободување на 1.950 палестински затвореници.

Израелската војска наводно објави дека ќе ги ограничи своите операции во Газа на одбранбени маневри.