Американскиот претседател Доналд Трамп најави прогласување национална вонредна состојба и федерализација на Вашингтон откако градоначалничката, Мјуриел Баузер, изјави дека нејзината полиција нема да соработува со Службата за имиграција и царина, објави „Ројтерс“.
Неколку илјади демонстранти излегоа на улиците овој месец поради распоредувањето на трупи на Националната гарда во главниот град во август од страна на Трамп, со цел „враќање на законот, редот и јавната безбедност“ откако американскиот претседател го нарече криминалот „срам за градот“.
– За само неколку недели, „местото“ целосно процвета прв пат по децении, практично без криминал“, објави Трамп на својата мрежа „Трут сошл“.
Националната гарда служи како милиција и е одговорна пред гувернерите на 50 држави, освен кога е повикана во федерална служба. Националната гарда на Вашингтон поднесува извештаи директно до претседателот.
Според документ до кој дошол „Вашингтон пост“, администрацијата на Трамп, исто така, планира да испрати околу 1.000 војници од Националната гарда во Њу Орлеанс, Луизијана, во најновиот обид на Белата куќа за распоредување воени сили во градовите предводени од демократите низ целата земја. Министерството за одбрана опишува потенцијален план на документ кој ќе важи до септември 2026 година, доколку републиканскиот гувернер на Луизијана, Џеф Ландри, го побара тоа.
