Американскиот претседател Доналд Трамп изјави дека кинескиот претседател Шји Џинпинг, заедно со рускиот претседател Владимир Путин и севернокорејскиот лидер Ким Џонг Ун, коваат заговор против САД.
„Ве молам, пренесете ги моите најтопли поздрави до Владимир Путин и Ким Џонг Ун додека ковате заговор против Соединетите Американски Држави“, напиша Трамп.
Пораката на Трамп дојде додека Кина беше домаќин на светските лидери за најголемата парада во историјата по повод 80-годишнината од капитулацијата на Јапонија во Втората светска војна.
„Големото прашање на кое треба да се одговори е дали кинескиот претседател Шји ќе ја спомене огромната поддршка и „крв“ што Соединетите Американски Држави ѝ ја дадоа на Кина за да ѝ помогнат да ја обезбеди својата слобода од многу непријателски странски напаѓач. Многу Американци загинаа во потрагата на Кина по победа и слава. Се надевам дека тие ќе бидат правилно почитувани и запаметени по нивната храброст и жртва!“, рече тој.
Трамп, исто така, посака „претседателот Шји и прекрасниот народ на Кина“ да уживаат во „голем и траен ден на прослава“.
Претходно, Трамп го изрази своето разочарување од Путин и најави одредени дејствија. Тој исто така рече дека внимателно ги следи постапките на Украина и Русија и повтори дека сака убивањето да престане.
