Трамп им се закани на сите земји кои се противат на неговиот план САД да ја преземат контролата врз Гренланд

Претседателот на САД, Доналд Трамп, се закани дека би можел да воведе царини за земјите кои не го поддржуваат неговиот план САД да ја преземат контролата врз Гренланд.

„Би можел да воведам царини за земјите ако не се согласат со Гренланд, бидејќи ни е потребен Гренланд за национална безбедност“, рече Трамп на тркалезна маса за рурално здравје во Белата куќа.

Трамп постојано изјавуваше дека САД „апсолутно“ мора да го преземат Гренланд, дополнително зголемувајќи го притисокот врз Данска, која формално е сопственик на островот.

Неговата изјава доаѓа по состанокот одржан во Белата куќа во среда, на кој учествуваа данскиот министер за надворешни работи Ларс Локе Расмусен и министерката за надворешни работи на Гренланд, Вивијан Мотцфелд, заедно со американскиот државен секретар Марко Рубио и потпретседателот на САД, Џ.Д. Венс.

Истиот ден, Врховниот суд на САД објави дека очекува во вторник да донесе долгоочекувана одлука за легалноста на царините на Трамп. Прашањето е дали претседателот може сам да воведе царини или за тоа е потребна согласност од Конгресот.

Трамп зборуваше на состанок кој формално беше посветен на инвестиции во руралните средини, но за време на своето обраќање, како што е неговиот обичај, тој се осврна и на други политички теми.