Американскиот претседател Доналд Трамп, изјави дека воздушниот простор над и околу Венецуела треба да се смета за целосно затворен, не давајќи други детали, додека Вашингтон го зголемува притисокот врз режимот на Николас Мадуро.
„До сите авиокомпании, пилоти, дилери на дрога и трговци со луѓе, ве молам, земете предвид дека воздушниот простот над и околу Венецуела е целосно затворен“, напиша Трамп на својата социјална мрежа.
САД со месеци напаѓаат бродови кои наводно превезуваат дрога, а американската војска го зголеми своето присуство во Карибите. Трамп притоа дозволи тајни операции на ЦИА во Венецуела и најави дека САД многу скоро ќе почнат копнени операции во земјата за да се сопрат венецуелските наркокартели.
Минатата недела, американските воздухопловни власти ги предупредија големите авиокомпании за „потенцијално опасна ситуација“ кога летаат над Венецуела поради „влошување на безбедносната ситуација и зголемената воена активност во или околу оваа земја“.
Администрацијата на Трамп го обвини Мадуро за вмешаност во трговија со дрога, што тој го негира. Мадуро, кој е на власт од 2013, изјави дека Трамп се обидува да го собори и дека граѓаните и војската на Венецуела ќе се спротивстават на секој таков обид.
Американските сили од септември извршија најмалку 21 напад врз наводни бродови со дрога во Карибите и Пацификот, при што загинале најмалку 83 луѓе.
