Претседателот на САД, Доналд Трамп, изјави дека ќе поднесе тужба од 15 милијарди долари за клевета и навреда против весникот „Њујорк тајмс“.
„Денес имам голема чест да поднесам тужба од 15 милијарди долари за клевета и навреда против „Њујорк тајмс“, рече Трамп во објава на неговата платформа за социјални медиуми „Truth Social“.
Тужбата ќе биде поднесена во Флорида, рече Трамп, без да даде дополнителни детали за случајот.
„На „Њујорк тајмс“ му беше дозволено да лаже, клевети и оцрнува предолго, а тоа сега престанува“, напиша Трамп на својата платформа „Truth Social“, додавајќи дека ќе се обрати до судот во американската држава Флорида.
Во својата порака, тој го нарече престижниот весник „еден од најлошите и најдегенерираните весници во историјата на Соединетите Американски Држави“.
Трамп го обвини „Њујорк тајмс“ дека е „вистински гласноговорник на радикално левичарската Демократска партија“ и дека ја поддржува Камала Харис за време на последната претседателска кампања.
„Њујорк тајмс“ „со децении е ангажиран против вашиот омилен претседател (мене!), моето семејство, мојот бизнис“, додаде Трамп.
„Њујорк тајмс“ не одговори веднаш на барањето за коментар.
