Трамп го стега обрачот околу Мадуро, венецуелската опозиција бара поголем притисок!

Доналд Трамп во вторникот изјави дека САД ќе воведат блокада врз Венецуела, таргетирајќи ги веќе санкционираните танкери за нафта, дополнително зголемувајќи го економскиот притисок врз Каракас и отворајќи ново поглавје во тековната криза меѓу двете земји.

Двете земји, кои со години се во конфликт, имаат затегнати односи откако Трамп се врати во Белата куќа во јануари, претворајќи го венецуелскиот претседател Николас Мадуро во негова меѓународна „црна овца“, пишува Еуроњус“.

„Наредувам целосна и тотална блокада на сите танкери за нафта кои се моментално санкционирани и одат во Венецуела или ја напуштаат“, рече републиканецот преку Truth Social.

Владата на Мадуро, тврди американскиот претседател, користи нафта за финансирање на „наркотероризам, трговија со луѓе, убиства и киднапирања“.

Тој исто така рече дека неговата одлука „вчера го означи венецуелскиот режим како странска терористичка организација“.

Каракас реагираше нарекувајќи ја „гротескна воена закана“ што ја „отфрла“.

„Претседателот на САД се обидува на сосема апсурден начин да воведе наводна воена поморска блокада на Венецуела со цел да го украде богатството што ѝ припаѓа на нашата земја“, се вели во соопштението на владата на претседателот Мадуро.

Администрацијата на Трамп го обвинува венецуелскиот претседател Мадуро дека е водач на мрежа за трговија со дрога, обвинение кое тој категорично го негира, обвинувајќи го Вашингтон дека се обидува да го собори со цел да ги заземе огромните нафтени резерви на латиноамериканската земја, објавува „Прототема“.

Од август, САД распоредија воени бродови во Карибите, вклучувајќи разорувачи со водени ракети и амфибиски бродови, подморница на нуклеарен погон, најголемиот носач на авиони во светот, „УСС Џералд Форд“, како и борбени авиони Ф-35, авиони за електронско војување Ф/А-18 Гроулер, а сега и авиони за воздушно полнење гориво со седиште во Порторико. Официјално, Вашингтон зборува за маневрите како дел од операција за борба против трговијата со дрога на американскиот пазар.

И од почетокот на септември, најмалку 26 бродови за кои администрацијата на Трамп вели дека се вклучени во трговија со дрога беа бомбардирани од американската војска, главно во Карибите и источниот Пацифик. Никогаш не се презентирани докази дека целните бродови биле вклучени во криминални активности. Најмалку 95 лица загинаа во овие напади.

Легалноста на овие операции е доведена во прашање од експерти и Обединетите нации.

„Венецуела е целосно опкружена со најголемата армада некогаш собрана во историјата на Јужна Америка“, изјави вчера Доналд Трамп, додавајќи дека нејзината моќ ќе продолжи да „расте“.

„Шокот што ќе го претрпи ќе биде без преседан“, се закани американскиот претседател, кој од време на време ја отвора можноста за копнени операции на венецуелска почва.

Политика што ја поздрави лидерката на опозицијата Марија Корина Мачадо, која ја освои овогодинешната Нобелова награда за мир, во текот на викендот таа изјави за американската телевизиска мрежа CBS News дека е потребен „поголем притисок“ за „Мадуро да сфати дека мора да си оди“, да се откаже од власта.

Венецуела, која е под ембарго на САД за нејзината нафта од 2019 година, е принудена да продава на црниот пазар по пониски цени. Поголемиот дел од нејзината продажба е наменета за Кина.