Трамп го откажа обезбедувањето на Камала Харис 

Претседателот Доналд Трамп ја откажа заштитата на Камала Харис од Тајната служба, која беше продолжена од Џо Бајден пред да ја напушти функцијата, според еден од нејзините советници.

Како поранешна потпретседателка, г-ѓа Харис имала право според законот да добие шестмесечно обезбедување по напуштањето на функцијата во јануари, кое требаше да истече во јули.

Нејзината заштита беше тивко продолжена за уште една година со директива потпишана од нејзиниот поранешен шеф, но беше отповикана од Трамп во меморандум од четврток, според меморандумот што го виде „Би-би-си“.

Овој потег доаѓа непосредно пред Харис да започне национална турнеја за промоција на „107 дена“ – мемоари за нејзината краткотрајна и на крајот неуспешна претседателска кампања во 2024 година.

Копија од писмото што го виде „Би-Би-Си“, од 28 август, ѝ наложува на Тајната служба да „прекине какви било процедури поврзани со безбедноста претходно одобрени со Извршен меморандум, надвор од оние што се бараат со закон“ за Харис од 1 септември.

Висок функционер на Белата куќа го потврди потегот.

Извори запознаени со ситуацијата изјавија за „Си-би-ес“, американскиот партнер на „Би-би-си“ за вести, дека неодамнешната проценка на заканите не пронашла ништо алармантно што би оправдало продолжување на нејзината заштита по законски утврдениот шестмесечен период на кој таа имала право.

Во 2008 година, Конгресот на САД донесе закон со кој ѝ се дозволува на Тајната служба да им обезбеди заштита на поранешните потпретседатели, нивните сопружници и сите деца под 16 години по напуштањето на функцијата.

Поминаа нешто повеќе од седум месеци откако Харис ја напушти функцијата на крајот од администрацијата на Џо Бајден во јануари.

Сопругот на Харис, Даг Емхоф, имаше сопствена заштита што заврши на 1 јули на крајот од законски утврдениот период.

Харис ќе ги изгуби агентите што се назначени да ја заштитат неа и нејзиниот имот во Лос Анџелес, како и проактивното разузнавање за закани спроведено за да се идентификуваат и спречат какви било потенцијални закани.

Цената на слични заштити, доколку се приватно финансирани, би можела да достигне милиони долари годишно.

Гувернерот на Калифорнија, Гавин Њусом, и градоначалничката на Лос Анџелес, Карен Бас, изразија негодување поради објавата.

„Ова е уште еден чин на одмазда по изгубениот список на политички одмазди во форма на отпуштања, одземање на безбедносни дозволи и друго“, изјави г-ѓа Бас за „Си-ен-ен“, кои први ја објавија приказната.

Градоначалничката на Лос Анџелес рече дека ова ја става Харис во опасност и дека таа ќе се погрижи да биде безбедна во Лос Анџелес.

Откако се врати во Белата куќа во јануари, Трамп ја отповика заштитата на Тајната служба за голем број луѓе, вклучувајќи ги Хантер и Ешли Бајден, децата на поранешниот претседател, и Ентони Фаучи, поранешниот директор на Националниот институт за алергии и заразни болести.

На неколку поранешни функционери и сојузници на Трамп им е одземена заштитата, вклучувајќи го поранешниот државен секретар Мајк Помпео и Џон Болтон, поранешен советник за национална безбедност кој стана гласен критичар.

Харис се соочи со неколку безбедносни закани за време на нејзиниот мандат, а поранешните функционери на Тајната служба рекоа дека опасностите се влошени од фактот дека таа беше првата жена и првата личност од различна боја на кожа што служеше во канцеларијата.

На пример, во август 2024 година, еден маж од Вирџинија беше обвинет за упатување онлајн закани за убиство, киднапирање или повреда на Харис и поранешниот претседател Барак Обама.

Во претходен инцидент во 2021 година, 39-годишна жителка на Флорида се изјасни за виновна за упатување закани против Харис откако призна дека му испратила видеа на својот затворен сопруг во кои покажува оружје и рекла дека „убиството“ може да се изврши во рок од 50 дена.

Трамп се соочи со два обиди за атентат за време на минатогодишната претседателска кампања, за време на која на Тајната служба ѝ се припишува клучна улога.