Американскиот претседател Доналд Трамп изјави дека украинското раководство „не покажало ни трошка благодарност“ за напорите на Вашингтон да ја прекине војната на Русија против Украина. Во објава на платформата Truth Social, Трамп нагласи дека „наследил војна што никогаш не требало да се случи“ и повтори дека конфликтот немаше да избувне доколку тој беше претседател во 2022 година.
Трамп напиша во објавата дека војната е „загуба за сите, особено за милионите луѓе што загинаа непотребно“ и го критикуваше Киев за неговата наводна неблагодарност и Европа за продолжување на купувањето руска нафта. Тој исто така рече дека САД „продаваат огромни количини оружје на НАТО“ за дистрибуција во Украина, обвинувајќи ја претходната администрација на Џо Бајден дека „дава сè бесплатно, вклучително и големи суми пари“.
Изјавите доаѓаат во време кога украинската делегација во Женева се подготвува за нова рунда разговори за предлогот на САД за прекин на војната. Рустем Умеров, поранешен министер за одбрана и секретар на Советот за национална безбедност на Украина, рече дека очекува напредок во преговорите. Во порака објавена на платформата X, Умеров истакна дека сегашниот нацрт-предлог „сè уште не е финализиран, но содржи голем број украински приоритети“.
