Американскиот претседател Доналд Трамп ненадејно го напушти самитот на Г7 што се одржува во Канада синоќа, еден ден порано, бидејќи конфликтот меѓу Израел и Иран се интензивираше.
Светските лидери се собраа во Канада за да помогнат во ублажувањето на глобалните тензии, но собирот беше нарушен од конфликтот околу нуклеарната програма на Иран, кој би можел да ескалира на неконтролирани начини, пишува агенцијата АП.
Израел започна бомбардирање на Иран пред четири дена.
На самитот, Трамп предупреди дека Техеран треба да ја ограничи својата нуклеарна програма пред да биде „премногу доцна“. Тој рече дека иранските лидери би сакале да разговараат, но дека веќе имале 60 дена да постигнат договор за нивните нуклеарни амбиции и не успеале да го сторат тоа пред да започне израелскиот напад, нагласувајќи дека „мора да постигнат договор“.
Трамп, кој се качи на претседателскиот авион во Калгари и се враќа во Вашингтон, не даде никакви изјави за новинарите. Тој ги прескокнува состаноците на Г7 закажани за денес, каде што требаше да се сретне со лидерите на некои земји поканети на самитот, како што се мексиканскиот претседател и украинскиот претседател, како и да разговара за тековните трговски прашања.
Американскиот претседател го напушти самитот на Г7 порано „поради она што се случува на Блискиот Исток“, напиша неговиот прес-секретар на мрежата X.
Трамп само рече дека е „многу важно“ да се врати во Вашингтон за, како што додаде, „големи работи“.
Тој претходно преку социјалните мрежи ги повика Иранците веднаш да го евакуираат Техеран.
Ова предизвика многу шпекулации, како на пример дека американските трупи би можеле да се приклучат на израелските напади врз Иран, но ова беше цврсто демантирано од официјални лица во Белата куќа и Вашингтон.
Трамп побара од Советот за национална безбедност да се состане во Вашингтон, но САД нема да се приклучат на израелската офанзива врз Иран, изјавија американски претставници, објави Би-Би-Си.
Пред да го напушти самитот, Трамп потпиша заедничка изјава со другите лидери на Г7 за конфликтот меѓу Иран и Израел, опишувајќи го Техеран како „главен извор на регионална нестабилност и терор“. Во соопштението не се повикува на прекин на огнот.
