„Трамп да биде храбар и да го исплаши Путин“, бара Зеленски

Украинскиот претседател Володимир Зеленски го повика својот американски колега Доналд Трамп да покаже „јасна позиција“ за санкциите против Русија и безбедносните гаранции за Украина со цел да се запре рускиот претседател Владимир Путин и да се стави крај на војната.

Тој ги даде овие забелешки во ексклузивно интервју за Скај њуз во Претседателската палата во Киев, каде што рече дека Трамп треба да преземе „силни лични чекори“ и да го „исплаши Путин“.

„А, тоа може да се случи само ако Трамп е храбар“, рече украинскиот претседател.

Зеленски рече дека единствениот начин да се запрат борбите во неговата земја е прво да се воспостават јасно дефинирани безбедносни гаранции.

Верувам дека САД се доволно силни за да донесат свои одлуки, рече Зеленски. „Верувам дека Доналд Трамп може да ни даде системи за воздушна одбрана во доволни количини, а САД имаат доволно од нив“.

Тој додаде дека е уверен оти Вашингтон може да воведе санкции што ќе ѝ наштетат на руската економија. „Сигурен сум дека САД можат да применат доволно санкции за да ѝ наштетат на руската економија, плус Доналд Трамп има доволно моќ да го натера Путин да се плаши од него“, рече тој, потсетувајќи дека Европа веќе воведе 18 пакети санкции. „Сега недостасува силен пакет санкции од САД“, додаде тој.

Зеленски, исто така, ги даде своите коментари во контекст на неодамнешниот самит меѓу Трамп и Путин во Алјаска, кој остро го критикуваше. Тој рече дека Трамп „му дал многу на Путин“ и дека „требало да плати повеќе“ за состанокот.

„Верувам дека доколку беше трилатерален состанок (со вклучување на Украина), ќе имавме некои резултати“, додаде тој.

По веста дека британските борбени авиони пресретнале руски дрон над Полска, Зеленски предупреди дека Путин ја тестира силата на Северноатлантската алијанса. „Тој го тестира НАТО“, рече Зеленски. „Тој сака да види за што е подготвено НАТО, за што се способни, дипломатски и политички, и како локалното население ќе реагира на тоа“.

Според него, Москва испраќа уште една порака: „Не се осмелувајте да ѝ дадете на Украина дополнителни системи за воздушна одбрана, бидејќи можеби ќе ви бидат потребни и вам“.