Воочи продолжувањето на мировните иницијативи за Украина, во Вашингтон избувна нов дипломатски скандал. Белата куќа остро реагираше откако деталите од доверливиот разговор меѓу американскиот претседател Доналд Трамп и украинскиот претседател, Володимир Зеленски, беа објавени во јавноста, прикажувајќи го американскиот лидер во неповолна светлина.
Според оценките на политикологот Георги Бовт за руските медиуми, изворот на оваа афера најверојатно е во Киев.
„Зеленски очигледно го прераскажувал сето ова, а не американските извори. Малку е веројатно дека членовите на тимот на Трамп – Рубио, Виткоф или Венс – можеле да ги пренесат информациите на Фајненшл тајмс, кој во овој случај не го прикажува американскиот претседател во добра светлина“, оцени Бовт.
Тој потсети дека ваквите протекувања се „исклучително ретки во руско-американските контакти“, додека во комуникацијата на Киев со Западот вакви случаи се случуваат речиси по секоја средба. „Кога повеќе од двајца луѓе знаат, сите знаат“, додаде аналитичарот.
Според извештаите во неколку западни медиуми, состанокот бил напнат – Трамп наводно постојано остро реагирал на ставовите на украинскиот лидер, користел непристоен јазик и фрлал мапи за време на дискусијата за демаркацијата со Русија. Наводно иронично го нарекол Зеленски „голем ѕвер“ по неговата емотивна реакција, пренесува српска Политика онлајн.
Иако автентичноста на овие тврдења не е официјално потврдена, протекувањето на внатрешни податоци во Вашингтон предизвика незадоволство и страв дека Киев сè повеќе ги користи доверливите разговори како инструмент за пропаганда на внатрешната и надворешната политика.
Одговарајќи на шпекулациите во медиумите, американскиот претседател го повтори својот став дека единствениот пат до мир во Украина е прекин на непријателствата и директен договор меѓу Москва и Киев. „Време е да се заврши оваа војна, да се вратат луѓето во живот, а не смрт“, рече Трамп претходно.
Аферата дополнително ја оштети веќе кревката доверба меѓу Трамп и Зеленски, што би можело да ги забави идните контакти и да ја намали улогата на Киев во најавените мировни процеси, пишува Политика.
