Трамп: Ако „Хамас“ продолжи да убива луѓе во Газа, ќе мора да влеземе и да ги убиеме

Американскиот претседател Доналд Трамп во понеделникот изјави дека постои можност за вклучување на САД во конфликтот против палестинската милитантна група Хамас ако групата продолжи да убива луѓе во Појасот Газа.

„Ако „Хамас“ продолжи да убива луѓе во Газа, што не беше договорено, нема да имаме друг избор освен да влеземе и да ги убиеме.

Ви благодарам за вниманието на ова прашање“, рече Трамп во објава на социјалната мрежа Truth Social. Трамп претходно ги спореди убиствата на Хамас со сегашните операции за контрола на криминалот.

„Тие навистина елиминираа неколку банди кои беа многу лоши. Убија неколку членови на бандата.

Да бидам искрен, не ме загрижуваше многу“, рече американскиот претседател претходно оваа недела.

Хамас е обвинет за масовни егзекуции и судири со сопернички кланови откако стапи на сила договорот со Израел, пренесува „Танјуг“.

Во судирите меѓу безбедносните сили на Хамас и вооружените членови на локалниот клан Дугмуш во градот Газа во неделата загинаа околу 30 лица, во еден од најнасилните внатрешни судири од завршувањето на големите израелски операции во енклавата.