Најмалку 34 лица загинаа, а неколку патници се водат како исчезнати откако туристички брод се преврте денес во Виетнам поради лоши временски услови.
Несреќата се случила во заливот Ха Лонг, популарна туристичка дестинација на северот од земјата, а повеќето од патниците биле виетнамски семејства кои дошле во посета од главниот град Ханој, јавува „Би-би-си“.
Силните дождови го отежнуваат пребарувањето на преживеани, но досега се спасени 11 лица од водата.
Бродот „Wonder Seas“ превезувал 53 лица кога се превртел по ненадејна бура, соопшти виетнамската морнарица.
Четиринаесетгодишно момче е спасено откако поминало четири часа заробено во воздушен џеб во трупот на превртениот брод, а директорот на болницата Ле Нгок Дунг изјави дека меѓу спасените е и 10-годишно момче кое е во стабилна состојба.
Најмалку осум од 34-те жртви досега се деца.
Спасувачите ќе продолжат да бараат во текот на ноќта за оние кои сè уште се водат како исчезнати.
Заливот Ха Лонг, во покраината Куанг Нин, е дом на стотици мали острови и е место на светското наследство на УНЕСКО.
Заливот го посетуваат повеќе од четири милиони туристи годишно.
