Шпанскиот тенисер Карлос Алкараз неодамна беше поразен во финалето на Вимблдон од Јаник Синер, а на легендарниот Џими Конорс не му се допадна неговото однесување за време на тој натпревар. Алкараз го доби првиот сет со 6:4, но потоа ги загуби следните три со ист резултат.
По еден брејк во секој од трите сета беше доволен за Синер, а познатиот Американец верува дека Шпанецот лесно се предаде. Во еден момент, Алкараз им се обрати на своите во тимови и им рече дека Синер е премногу доминантен во размените на основната линија.
Конорс беше гостин во подкастот што го водеше познатиот тренер Патрик Муратоглу, а во таа прилика зборуваше за финалето.
„Според мене, неговиот пристап беше неприфатлив, не требаше да се однесува така. Се пожали на својот тим и покажа слабост што не требаше да ја покаже во тој момент. Требаше да се обиде да најде ново решение и да направи нешто различно, само така ќе имаше шанса да се врати. Ако планот А не ти функционира, мора да смислиш нешто друго. И јас сум бил во големи проблеми во финалињата на грен слем турнирите и не сум знаел што да правам, тоа им се случува на сите. Но, тој се откажа премногу лесно“, рече Конорс.
И покрај поразот, младиот Шпанец по финалето изјави дека е задоволен.
„Среќен сум и горд на сè што правам. На почетокот на сезоната малку се мачев, но потоа одеднаш почнав да уживам на теренот и повторно да играм добро. Ја почувствував таа возбуда кога излегувам на теренот, благодарение на моето семејство и мојот тим. Без нив, сето ова не би било можно, да играм исклучителен тенис и да стигнам до тука. Досега беше посебно патување за мене, сакам да продолжам вака и да останам во можност да донесам радост на теренот“, рече Алкараз.
