Малолетник од Полска е уапсен во грчкиот град Катерини и обвинет за брутално убиство кое наводно го извршил во својата земја. Станува збор за 17-годишен тинејџер кој дошол во Грција на организирана екскурзија неколку дена по злосторството.
Уапсеното лице е обвинето за убиство на жена во град во североисточна Полска, на 23 април.
Според кривичната пријава, 17-годишникот наводно ја влечел жената до столарската работилница, каде ја удрил неколку пати со секира или чекан. Тој е обвинет и дека ја запалил со истурање на непозната хемиска супстанца врз нејзиното тело, а потоа телото го фрлил во пластична канта за ѓубре.
Тинејџерот бил идентификуван од полските власти и по него била распишана потерница, која била извршена во Грција, кога бил лоциран.
Се очекува обвинетиот да биде изведен пред Обвинителството на Апелациониот суд во Солун за да започне постапка во врска со полското барање за екстрадиција.
