Тим мора да го менува своето име поради Израел

Екипата на Израел Премиер Тек беше во центарот на вниманието на познатата велосипедска трка во Шпанија – „Вуелта“, која заврши на 14 септември, откако поради неговото учество беа одржани пропалестински протести.

Спонзорот на Премиер Тек соопшти дека очекува „тимот да еволуира кон ново име кое го исклучува „Израел“, што ќе доведе до нов идентитет и создавање ново име на тимот, објави „Би-би-си“.

Канадската компанија би можела да го прекине партнерството со тимот следната сезона, додавајќи дека „сегашната ситуација во врска со името на тимот веќе не е одржлива“.

– Свесни сме дека меѓународната ситуација значително се промени од нашето деби на светско тркачко ниво во 2017 година. Оваа велосипедска сезона продолживме да ја почитуваме таа обврска, додека проактивно се вклучуваме во дискусии со тимот и со неговите партнери. Исходот од овие дискусии ќе биде клучен за да се утврди дали Премиер Тек ќе остане посветен на тимот во иднина, се вели во соопштението.

Тимот вклучува и пет Британци, вклучувајќи го и четирикратниот шампион на Тур де Франс, Крис Фрум. Тимот е регистриран во Израел и е во сопственост на израелско-канадскиот милијардер Силван Адамс.

Тимот изјави дека моментално е во фаза на планирање на своето ново име за 2026 година и дека ќе ги објави сите потенцијални промени во догледно време.

Адамс е близок соработник на израелската влада, а претходно за „Би-би-си“ изјави дека е „самопрогласен амбасадор на Израел“.

За време на Вуелта, тимот го отстрани името Израел од својата опрема, по протестите и барањата да биде исфрлен од трката поради војната во Газа.

Повеќе од 100.000 луѓе се собраа во Мадрид за време на последната фаза за да ги поддржат протестите.

Израел ја нападна Газа како одговор на нападот на Хамас на 7 октомври 2023 година, во кој беа убиени 1.200 луѓе, а 251 беа киднапирани.

Според Министерството за здравство, најмалку 65.419 луѓе загинаа во Газа од тогаш до денес.