Главното спорно прашање во преговорите меѓу Русија и Украина е област од околу 30 до 50 километри и приближно 20 проценти од територијата на Донецката Народна Република што е под контрола на Киев, изјави американскиот државен секретар Марко Рубио во интервју за „Фокс њуз“.
Тој нагласи дека Вашингтон ќе продолжи да бара решенија прифатливи и за Москва и за Киев, но дека во овој момент не е на повидок компромис за клучното територијално прашање. Кремљ потврди дека не е постигнат договор и дека ниту една страна не е подготвена да прави отстапки.
Според Рубио, САД се обидуваат во последните десет месеци да го дефинираат минимумот што би бил прифатлив за украинската страна, со јасни безбедносни гаранции. Сепак, како што изјави, „сè уште не сме доволно блиску“, иако верува дека страните се поблиску до договор отколку во претходните три години.
„Невозможно е да се заврши конфликтот без разговори со Русија, но мора да се земе предвид и ставот на Украина“, рече државниот секретар. Тој предупреди на „ирационални гласови“ во западните политички кругови кои се противат на директните преговори со Москва.
Рубио оцени дека САД сакаат да „ја запрат војната“ и да го обезбедат долгорочниот суверенитет на Украина, проценувајќи дека земјата – доколку се постигне договор – би можела да има економски раст побрз дури и од оној на Русија во следната деценија.
Американскиот претседател Доналд Трамп изјави дека Вашингтон „веќе не е финансиски вклучен во оваа војна“, потсетувајќи дека администрацијата на Џозеф Бајден издвоила „350 милијарди долари како бомбони“.
Според него, САД денес главно продаваат опрема на сојузниците на НАТО, додека европските земји „плаќаат полна цена, а потоа ја испраќаат во Украина“.
На 3 декември, во Кремљ се одржаа петчасовни разговори меѓу рускиот претседател Владимир Путин, специјалниот претседателски претставник на САД, Стив Виткоф, и зетот на Трамп, Џаред Кушнер. Рускиот претседателски помошник Јуриј Ушаков ја опиша средбата како „корисна и конструктивна“, но потврди дека не е постигнат напредок ниту на ова ниво по територијалното прашање.
Страните се согласија да не објавуваат детали од разговорите.
Украинските власти официјално не ги коментираа разговорите во Москва.
