Тензично во Нови Сад, блокадата во судот продолжува и денеска, пристигнаа полицијата и жандармеријата

На повик на студентите кои го блокираа Универзитетот во Нови Сад, граѓаните останаа да ја блокираат зградата и во текот на ноќта, дежурајќи наизменично.

Припадниците на Жандармеријата и на полициската интервентна бригада утринава по 5 часот и 30 минути пристигнаа во дворот на судската зграда во Нови Сад, каде од вчера утрото трае блокадата.

Таму ги пречекале голем број граѓани кои ја минале ноќта блокирајќи го влезот во зградата.

Како што пренесува Ал Џезира, ситуацијата во Нови Сад повторно е тензична.

„Приведен е фоторепортер. Прво полицијата го повлече додека фотографирал, иако носел кацига со натписот прес. Кога продолжил да фотографира при повлекувањето на полицијата, му рекле да престане да ги провоцира, а потоа го внеле во полициски автомобил иако рекол дека е новинар“, пренесува медиумот.

Полицијата тврди дека кај него пронашла солзавец. Еден човек падна додека ја туркаше полицијата и накратко изгуби свест, јави Ал Џезира.

Во дворот веќе се стационирани припадници на полициската интервентна бригада, опремени за разбивање демонстрации.

На повик на студентите кои го блокираа Универзитетот во Нови Сад, граѓаните останаа да ја блокираат зградата и во текот на ноќта, дежурајќи наизменично, пренесува Бета.

Зградата во која се наоѓаат судовите и обвинителствата е блокирана бидејќи на активистите од Движењето на слободни граѓани и неформалната студентска организација СТАВ по трет пат им е одреден притвор до 30 дена.

Марија Васиќ, професорка по социологија во гимназијата „Јован Јовановиќ Змај“, во понеделникот започна штрајк со глад и жед, по продолжувањето на притворот, а вчера во тешка состојба беше префрлена во болницата во Централниот затвор во Белград.

Семејството, според сведочењето на сопругот и синот, немало информации каде се наоѓа, а блокадата на судот и обвинителството продолжила со барање да се ослободат сите приведени.

Се повикуваат граѓаните денеска да ја блокираат зградата и да не дозволат вработените да влезат во неа, откако вчера со помош на полициски кордон прво влегоа во зградата, а попладнето излегоа од работа.

Во вторникот советот на Вишиот суд им го продолжи притворот на ученикот Лазар Диниќ, професорка Марија Васиќ, градскиот советник Младен Цвијетиќ и уште тројца членови на Движењето на слободни граѓани, кои веќе два месеца се во притвор за уште 30 дена.

Тие, заедно со уште шест студенти од Филозофскиот факултет кои се надвор од државата, беа обвинети дека подготвувале дела против уставниот поредок и безбедноста на Србија.

Србија беше зафатена од бран протести по уривањето на настрешницата на железничката станица во Нови Сад во ноември минатата година, кога животот го загубија 16 лица.

Претседателот Александар Вучиќ ги нарекува протестите обоена револуција и обид за дестабилизација на земјата по налог на странски разузнавачки служби. Студентите ги отфрлаат обвинувањата и бараат предвремени парламентарни избори.