Температурите паднаа на минус 39, сообраќајот е парализиран: Туристите „заложници“ на популарна празнична дестинација

Илјадници туристи се заглавени во финска Лапонија откако силен бран екстремно студени услови ги приземји авионите на еден од тамошните аеродроми.

Сите неделни полетувања од аеродромот Китила што требаше да летаат до Лондон, Бристол, Манчестер, Париз и Амстердам беа откажани, бидејќи температурата не се искачи над -35 степени во текот на денот, пренесува дневник.хр.

Според прогнозата на Финската метеоролошка агенција, минималната температура би можела да падне на -39, а првиот планиран лет од Китила веќе е откажан.

Екстремниот студ го отежнува одмрзнувањето на авионите, додека опремата за одржување и полнење гориво на тлото буквално замрзнува, објавува „Би-би-си“.

Операторот Финавија му соопшти на јавниот сервис дека ситуацијата е дополнително влошена од високата влажност, што создава опасен слој мраз.

Иако Лапонија, која се протега низ северна Норвешка, Шведска и Финска, е позната по своите студени зими и обилните снежни врнежи, просечната зимска температура во финскиот дел од регионот е околу -14 степени Целзиусови, со повремени падови до -30.

Аеродромот Китиле првенствено им служи на патниците кои доаѓаат во блиските скијачки центри и ја гледаат поларната светлина, додека аеродромот „Рованиеми“, кој се наоѓа подалеку на југ, е официјална влезна точка за посетителите во домот на Дедо Мраз.

Еден лет од Рованиеми беше откажан во недела, а летовите до и од Китиле беа откажани во петок и сабота.

Студот, исто така, значително ги влоши условите на патиштата, а сообраќајната служба предупреди на ледени услови и опасни услови за возење. Во такви околности, автобус што превезуваше украински патници слета во ров во недела наутро, но немаше сериозни повреди.

Невообичаено ниските температури во Лапонија се поврзани со бурата што минува низ северна Европа, носејќи зимски услови и сериозни прекини во сообраќајот низ целиот континент.