Иранскиот претседател Масуд Пезешкијан нареди повторно воспоставување на меѓународниот пристап до интернет, објавија денес иранските државни медиуми, повикувајќи се на раководителот на односи со јавноста во Министерството за комуникации.
Одлуката доаѓа по речиси три месеци ограничувања во текот на кои повеќето ирански граѓани не можеа да пристапат до глобалната мрежа. Според податоците од организацијата NetBlocks, блокадата траела вкупно 87 дена, додека мал број корисници успеале да ги заобиколат ограничувањата користејќи поскапи и понапредни VPN услуги.
Иранските власти речиси целосно го ограничија пристапот до интернет по почетокот на американските и израелските напади, во период на зголемени воени активности и безбедносни операции во земјата. Ограничувањата беа воведени паралелно со обидите за контрола на протокот на информации за време на војната.
Исклучувањето на интернетот не е ништо ново во Иран. Слични мерки беа применети од властите за време на претходните антивладини протести, кога пристапот до мрежата беше ограничен со цел да се забави ширењето на информациите и да се отежни организирањето демонстрации.
Враќањето на меѓународниот пристап до мрежата следеше по неколкумесечни ограничувања кои, според организациите што ја следат дигиталната слобода, имаа големо влијание врз секојдневниот живот на граѓаните, бизнисот и комуникацијата со странските земји.
Иранските власти сè уште не објавија кога пристапот до интернет би можел целосно да се нормализира.
