Тајван издвојува 40 милијарди долари за воениот буџет и за воспоставување на одбранбена купола

Претседателот на Тајван, Лаи Чинг-те, денес објави посебен буџет за набавка на оружје од 40 милијарди долари, вклучувајќи ја и изградбата на систем за воздушна одбрана со високи можности за откривање и пресретнување, наречен Тајванска купола, бидејќи САД вршат притисок врз островот да ги зголеми своите трошоци за одбрана, пренесе „Бета“.

Буџетот ќе биде распределен во текот на осум години, од 2026 до 2022 година, а дојде откако Лаи веќе вети дека ќе ги зголеми воените трошоци на островот на пет проценти од БДП како дел од неговата стратегија против заканите од кинеска инвазија.

„Заканите на Кина кон Тајван и Индо-пацифичкиот регион ескалираат. Неодамна, во Јапонија, Филипините и околу Тајванскиот теснец се случуваат разни видови воени упади, поморски сиви зони и кампањи за дезинформации, предизвикувајќи голема непријатност и вознемиреност за сите страни во регионот“, рече тој.

„Тајван, како најважен и најкритичен дел од островскиот синџир, мора да ја покаже својата решеност да преземе поголема одговорност за својата одбрана“, додаде тој, осврнувајќи се на низата острови што се протега од Источнокинеското Море на Јапонија до Филипините во Тихиот Океан.

Моментално, Тајван постави зголемување на воениот буџет на 3,3 проценти од БДП за 2026 година, издвојувајќи 949,5 милијарди тајвански долари (31,18 милијарди американски долари).

Американскиот претседател Доналд Трамп побара од Тајван да ги зголеми своите трошоци за одбрана на дури 10 проценти од БДП, дел далеку над она што САД или кој било од нивните водечки сојузници.

Стејт департментот во понеделникот соопшти дека го поздравува објавувањето на буџетот на Тајван и го поддржува стекнувањето на „критични одбранбени капацитети соодветни на заканите со кои се соочува“.

Стејт департментот додаде дека го поздравува заложбата на администрацијата на Лаи да ги зголеми воените трошоци на најмалку 5 проценти од БДП, што ја покажува нејзината решеност да ги зајакне капацитетите за самоодбрана на Тајван.

Лаи напиша уреднички текст во „Вашингтон пост“ пред денешното објавување, велејќи дека специјалниот буџет ќе се користи за купување оружје од САД. Тој им рече на новинарите во понеделник дека буџетот нема никаква врска со преговорите за царини на владата со САД.

Министерот за одбрана на Тајван, Велингтон Ку, денес изјави дека 40 милијарди долари е горната граница за специјалниот буџет и ќе се користат за купување прецизни водени ракети и работа на заеднички развој на набавка на воена опрема и системи меѓу Тајван и САД.