Британскиот боксер Тајсон Фјури (37) се враќа од пензија за да се бори против Арсланбек Махмудов на 11 април на стадионот „Тотенхем Хотспур“ во Лондон. Тоа ќе биде неговата прва борба по речиси четири години пред домашна публика и ќе се емитува низ целиот свет на „Нетфликс“.
Поранешниот светски шампион во тешка категорија се повлече од спортот за последен пат по два последователни порази од Украинецот Александр Усик. Фјури, кој направи неколку враќања и излегувања во текот на својата кариера, има професионален рекорд од 34 победи, два порази и едно реми, со 24 нокаути.
„Возбуден сум што се вратив. Моето срце отсекогаш било и секогаш ќе биде во боксот“, рече Фјури. „Кралот на Ромите“, исто така, објави дека планира да боксува три пати во 2026 година, а Фабио Вордли е споменат како можен летен противник.
Неговиот противник Махмудов, кој се смета за еден од најопасните нокаут борачи во дивизијата, е подготвен за предизвикот. Тој нокаутирал 19 од 21 противник во својата кариера, има два пораза во 23 борби и влегува во оваа по својата најголема победа. Ја постигна со едногласна одлука на судиите против Дејв Ален минатиот октомври во борба за интерконтиненталната титула во тешка категорија на WBA.
„Воодушевен сум за оваа можност. Доаѓам во војна. Тајсон Фјури беше голем шампион. Ќе бидам поподготвен од кога било да си заминам со голема победа“, рече Махмудов.
Стадионот на фудбалскиот клуб Тотенхем веќе беше домаќин на големи боксерски настани, вклучувајќи две распродадени борби помеѓу Крис Јубанк Јуниор и Конор Бен, од кои првата беше прогласена за борба на годината на неодамнешното доделување на наградите „Ринг“.
Се очекува списокот на другите борби за настанот на 11 април да биде објавен во наредните недели.
