Во текот на изминатите три дена во Флорида, украинската делегација одржа серија продуктивни и конструктивни состаноци со американски и европски партнери, напиша Виткоф
Во Флорида вчера се одржа посебен состанок во формат САД-Украина, објави специјалниот претставник на САД Стив Виткоф, истакнувајќи дека фокусот на состанокот беше на документи поврзани со понатамошниот развој на планот од 20 точки, усогласување на ставовите за меѓународните безбедносни гаранции, усогласување на ставовите за безбедносните гаранции на САД за Украина, како и понатамошен развој на економскиот план.
„Во текот на изминатите три дена во Флорида, украинската делегација одржа серија продуктивни и конструктивни состаноци со американски и европски партнери. Особено внимание беше посветено на дискусијата за временските рамки и редоследот на следните чекори. „Украина останува целосно посветена на постигнување праведен и одржлив мир“, напиша Виткоф на својот X профил.
Тој нагласи дека заеднички приоритет е да се запре војната, да се постигне договор за безбедносни гаранции и да се создадат услови за закрепнување, стабилност и долгорочен просперитет на Украина. „Мирот мора да биде не само прекин на непријателствата, туку и достоинствена основа за стабилна иднина. Украина високо го цени лидерството и поддршката на Соединетите Американски Држави и континуираната тесна координација со своите партнери во следните фази од оваа важна работа“, наведе Виткоф.
Тој додаде дека, покрај него, во американската делегација биле и зетот на американскиот претседател Доналд Трамп, Џаред Кушнер, и членот на персоналот на Белата куќа, Џош Гринбаум. Во украинската делегација биле и секретарот на Советот за национална безбедност и одбрана, Рустем Умеров, и началникот на Генералштабот на вооружените сили, генерал-потполковник Андриј Хнатов.
