Светската здравствена организација (СЗО) предупреди дека епидемијата на колера во 31 земја се влошува, со зголемување на бројот на жртви од болеста и досега починале 4.738 лица од колера.
СЗО посочи дека случаите на колера се шират глобално и стапката на смртност се зголемува.
„Со оглед на обемот и меѓусебната поврзаност на епидемиите, ризикот од понатамошно ширење во рамките на и меѓу земјите е многу висок“, се вели во извештајот на СЗО.
Најголемите жаришта на колера во моментов, според СЗО, се Чад, Конго, Судан и Нигерија.
Вооружените конфликти, сиромаштијата и несоодветната инфраструктура се наведуваат како главни причини за ширењето на епидемијата на колера, а се истакнува дека ризикот е особено висок во руралните области и областите погодени од поплави.
Колерата е заразна цревна инфекција предизвикана од бактеријата Vibrio cholerae, особено распространета во области со лоша хигиена и обично се пренесува преку контаминирана вода и храна.
