Засладените и алкохолните пијалоци се премногу евтини бидејќи се недоволно оданочени, што доведува до повисоки стапки на дебелина, дијабетес и други болести, вели Светската здравствена организација (СЗО). Децата и адолесцентите се особено погодени, според СЗО.
Даноците на ваквите пијалоци треба да се воведат или зголемат, вели Светската здравствена организација. Ова би ги направило пијалоците поскапи, што би довело до помала потрошувачка, а во исто време би се собрале повеќе пари за здравствениот систем.
Според податоците на СЗО, 116 земји низ целиот свет веќе ги оданочуваат безалкохолните пијалоци и другите засладени пијалоци, но многу други пијалоци со висока содржина на шеќер сè уште не се опфатени со даноци, како што се 100% овошни сокови, засладени млечни пијалоци и инстант кафе или чаеви.
„Здравствените даноци се една од најмоќните алатки што ги имаме за унапредување на здравјето и спречување на болести“, рече генералниот директор на СЗО, Тедрос Аданом Гебрејесус. СЗО, исто така, забележа дека најмалку 25 земји, претежно во Европа, вклучувајќи ја и Германија, немаат специфичен акцизен данок за вино.
За разлика од виното, силните алкохолни пијалоци како што се овошните ракии, коњакот, вотката или вискито подлежат на данок на алкохол, додека пивото се оданочува со посебен данок на пиво. Консумирањето алкохол може да доведе до болести, насилство и повреди и заболувања, предупредува еден од директорите на СЗО, Етјен Круг.
„Додека индустријата остварува профит, јавноста честопати ги сноси здравствените последици, а општеството ги сноси економските трошоци“, рече Круг.
