Светот згрозен: Нов талибански закон им дозволува на мажите да ги тепаат своите жени

Талибанците усвоија нов кривичен законик со кој практично се легализира семејното насилство и се казнуваат жените кои бегаат од злоупотреба, додека критиките кон владата се третираат како кривично дело.

Талибанската влада во Авганистан усвои нов кривичен законик кој им дозволува на мажите да ги тепаат своите сопруги, сè додека не им предизвикаат отворени рани или не кршат коски, објавува британскиот весник „Телеграф“.

Документот од 60 страници е потпишан од врховниот лидер на Талибанците, Хибатула Ахунџада, и веќе е дистрибуиран до судовите низ целата земја. Тепањето на сопружник е класифицирано како „тазир“ или дискрециона казна, а не како кривично дело.

Според новите правила, на сопругот му е дозволено физички да ги казнува сопругата и децата, додека посериозните повреди ретко се гонат, со максимална казна од 15 дена затвор. За да поднесе жалба, жената мора лично да ги покаже повредите на машки судија, со задолжително присуство на машки старател – кој во повеќето случаи е насилникот.

Законот понатаму предвидува дека жена која оди во куќата на своите родители без дозвола од сопругот, дури и ако бега од насилство, може да биде осудена на затвор до три месеци, како и членовите на семејството кои ѝ обезбедуваат засолниште.

Во исто време, јавната дебата за кодексот е криминализирана. Критиката кон раководството на Талибанците, вклучително и забраната за образование на девојчињата, се третира како кривично дело. Навредувањето на лидерите е казниво со камшикување и затвор.

Законот го дели општеството на четири класи, а казните за истите прекршоци варираат во зависност од социјалниот статус на сторителот. Религиозните малцинства се етикетираат како „отпадници“, а на наставниците и татковците им е дозволено физички да ги казнуваат децата.

Откако се вратија на власт во август 2021 година, Талибанците систематски ги ограничуваат правата на жените, вклучително и забраната за образование, работа и слобода на движење.