Свечено доделување на наградите „13 Ноември“ на Град Скопје за 2025

Со свечена манифестација денеска беше одбележа 13 Ноември, Денот на ослободувањето на Скопје. Градоначалникот Орце Ѓорѓиевски пред присутните одржа говор во кој се осврна на 81-годишнината од ослободувањето и на визијата за иднината на градот.

Нашата задача денес е јасна. Да го изградиме Скопје повторно гордо, достоинствено и современо. Да го направиме град што ќе биде пример, уреден, зелен и безбеден. Град што ќе дише, што ќе спојува, што ќе инспирира. Да го направиме Скопје град што ќе им служи на луѓето и ќе им дава причина да се гордеат што се негови жители, порача вечерва градоначалникот на Град Скопје Орце Ѓорѓиевски на доделувањето на наградата „13 Ноември“.

Ѓорѓиевски истакна дека 13 Ноември е „најсветлиот ден во историјата на нашиот град“, кога храбрите борци на македонската војска од 42-та и 50-та народноослободителна дивизија, заедно со 16-та македонска бригада, го ослободиле Скопје по тешки повеќедневни битки.

Градоначалникот потсети на уличните битки кај Главната пошта, Офицерскиот дом, Народната банка и Старата железничка станица. Тој ја нагласи и храброста на македонските борци кои ја спасиле хидроцентралата Матка од уништување, како и на невооружените цивили кои со своите животи го одбраниле Камениот мост од разурнување.

На свеченоста беа доделени и наградите „13 Ноември“ за оние кои го градат духот на градот. Меѓу добитниците се:

Публицистика: д-р Марјан Патлиџанковски

Образование: м-р Весна Недановска

Култура: Јавната установа Градска библиотека „Браќа Миладиновци“ – Скопје и Сузана Марковска

Наука: д-р Марјан Бојаџиев

Уметност: Димо Илиев

Здравствена заштита: проф. д-р Марија Јовановски Срцева

Социјална заштита: Делвина Крлуку

Спорт: Зоран Михајлов и Кристијан Јанев

Лице од друга држава: д-р Волфганг Давид

Најмлади: Андреј Тасиќ