Граѓанската иницијатива „SupportKocani“ ја реализира и третата пратка компресивна облека, наменета за повредените во пожарот во Кочани, соопштуваат оттаму.
„Облеката е веќе предадена на Општата болница во Кочани, со цел да се овозможи правилна рехабилитација и побрзо заздравување. Вредноста на оваа набавка изнесува 2.193.047 денари (35.555 евра), а парите се целосно обезбедени исклучиво преку донации од граѓани, компании и поддржувачи од земјата и дијаспората. Со ова, вкупната вредност на досегашните три испораки надминува 3,4 милиони денари. Со оваа пратка се опфатени втората тура на нарачки од првите две групи корисници на компресивна облека. Во оваа донација вкупно се обезбедени 176 парчиња специјализирана компресивна облека, изработени по индивидуални мерки за секој од засегнатите лица“, велат оттаму.
Овие материјали се наменети за третман на рани, регенерација на кожата и подобрување на процесот на рехабилитација, со цел полесно и побрзо опоравување на засегнатите лица.
Од SupportKocani додаваат дека сите донации се резултат на поддршката од хумани граѓани, компании и организации од земјата и дијаспората, кои несебично се вклучија во оваа акција.
„Овие бројки не се само финансиски податоци – тие се доказ за солидарност, заедништво и човечка хуманост. Благодарни сме на секој поединец и секоја компанија кои веруваа во оваа иницијатива и помогнаа од срце. Нашата работа не застанува тука – продолжуваме да бидеме тука за засегнатите лица и нивните семејства, сè додека постои потреба,“ – велат од SupportKocani.
ИЗДВОЕНИ
ГРАДОНАЧАЛНИЧКИТЕ КАНДИДАТИ НА ПОМОШ ВИКААТ И СТРАНСКИ ЕКСПЕРТИ:Кампањата носи и лек за урбанистичкиот хаос – или од Мексико или од Истамбул!
Во петок ќе се знае по колку советници ќе имаат општините и Град Скопје?!
Амбасадор Рафаел Сориано Ортиз: Шпанско-македонските односи и нивната перспектива во иднина
Турција – омилена дестинација за Македонците што не сакаат да вадат паричник на одмор
