Судија од Њу Хемпшир ја блокира наредбата на Трамп за одземање на државјанството по право на раѓање

Федерален судија од Њу Хемпшир, Џозеф ЛаПлант, денес изјави дека ќе одобри колективна тужба што ги опфаќа сите деца погодени од извршната наредба на американскиот претседател Доналд Трамп за одземање на државјанството по право на раѓање и дека ќе издаде привремена забрана за блокирање на наредбата.

Судијата ЛаПлант ја објави својата одлука по едночасовно сослушување и рече дека ќе следи писмена одлука, објавува „АП“.

Тој изјави дека решението ќе вклучува седумдневно одложување за да се овозможи поднесување жалба.

Неколку федерални судии издадоа национални забрани со кои се спречи стапувањето во сила на наредбата на Трамп, но Врховниот суд на САД ги ограничи тие забрани со пресуда од 27 јуни, давајќи им на пониските судови 30 дена да дејствуваат.

Имајќи го предвид тој временски рок, противниците на оваа промена брзо се вратија на судот за да се обидат да ја блокираат.

Во случајот на федералната држава Вашингтон пред 9-тиот Апелационен суд на САД, судиите побараа од страните да поднесат писмени поднесоци во кои ќе ги објаснат последиците од одлуката на Врховниот суд.

Државата Вашингтон и другите држави вклучени во таа тужба побараа од апелациониот суд да го врати случајот кај судија на понизок суд.

Како и во Њу Хемпшир, обвинителот во Мериленд се обидува да организира колективна тужба што ќе ги опфати сите луѓе кои би биле засегнати од оваа наредба.

Судијата одреди рок до среда за поднесување писмени правни аргументи додека разгледува барање од CASA, невладина група за права на имигрантите, за издавање нова национална забрана.

Тужбата, поднесена во име на бремена жена, двајца родители и нивните деца, е една од многуте што го оспоруваат јануарскиот налог на Трамп со кој се одзема државјанство на лица родени од родители кои нелегално или привремено престојуваат во САД.

Тужителите се застапувани од Американската унија за граѓански слободи (ACLU) и други.

Во прашање е 14-тиот амандман на Уставот, кој гласи: „Сите лица родени или натурализирани во Соединетите Американски Држави и кои се предмет на нивната јурисдикција се државјани на Соединетите Американски Држави“.

Администрацијата на Доналд Трамп тврди дека терминот „подлежи на нивна јурисдикција“ значи дека САД можат да одбијат државјанство на бебиња чии мајки нелегално живеат во земјата, со што се укинува она што се смета за суштински дел од американското законодавство повеќе од еден век, пренесува Танјуг.