Ако се обидувате да се наспиете добро, но не можете, можеби сте еден од многуте со ист или сличен проблем. Американските научници проценуваат дека околу 16 проценти од светската популација страда од несоница, додека неодамнешна студија на Националната фондација за спиење покажа дека дури 60 проценти од возрасните Американци не спијат доволно.
Несоницата е нарушување кое се карактеризира со тешкотии при заспивање и одржување на квалитетен сон, што на крајот може да резултира со рано будење со чувство на недостаток на сон, замор и намалена концентрација. Претходните студии го поврзаа премалку сон со неколку здравствени проблеми, од кои сите можат негативно да влијаат на животниот век на поединецот, објавува онлајн списанието Medical News Today.
Недоволниот сон го скратува животот
Најновата американска студија покажа дека недостатокот на сон има поголемо влијание врз пократкиот животен век од другите фактори што го сочинуваат животот, како што се исхраната, физичката активност и социјалните врски или социјалната изолација.
Претходните студии го поврзаа недоволното спиење со повеќе здравствени состојби кои можат негативно да влијаат на квалитетот на животот и животниот век на една личност, вклучувајќи кардиоваскуларни заболувања, дијабетес тип 2, дебелина, депресија, анксиозност, гастроинтестинални проблеми и деменција.
„Спиењето игра витална улога во речиси секој биолошки процес во нашите тела, но сепак тоа е однесување кое често го земаме здраво за готово“, изјави за MNT Ендру Мекхил, доктор на науки, вонреден професор и директор на Лабораторијата за спиење, хронобиологија и здравје на Колеџот за медицински сестри на Универзитетот за здравство и наука во Орегон (OHSU).
„Лесно е да се одложи добриот сон за викендот или да се потцени неговата важност поради работа или дружење, но помалку сон има последици врз нашето здравје и благосостојба“, рече Мекхил, главен автор на нова студија неодамна објавена во списанието Sleep Advances, која откри дека недоволното спиење е посилно поврзано со пократок животен век од кој било друг фактор, вклучувајќи ја исхраната, физичката активност и социјалната изолација, со исклучок на пушењето.
„Нашето истражување покажува дека без разлика каде живеете, без разлика дали е рурално, урбано, северно, јужно, источно, западно или градско…, сонот игра клучна улога во здравјето и благосостојбата на секој поединец“, рече Мекхил.
Сонот не е луксуз, туку биолошка неопходност
Д-р Пакај Нгаи, медицински директор на Центарот за спиење и будност во Медицинскиот центар Палисејдс во Њу Џерси, кој лекува пациенти со нарушувања на спиењето и несоница и не бил вклучен во студијата, изјави за MNT дека е изненаден од наодите на студијата, кои го открија процентот на луѓе кои имаат проблеми со спиењето.
„Спиењето не е луксуз или нешто за кое треба да се жртвува – тоа е едноставно биолошка неопходност која е исто толку важна како и, а во некои аспекти, поважна од другите фундаментални здравствени потреби“, рече тој.
Д-р Џими Јоханес, пулмолог и специјалист за интензивна нега во Медицинскиот центар „МеморијалКеар Лонг Бич“ во Лонг Бич, Калифорнија, кој не бил вклучен во студијата, се согласува дека тоа само ги потврдува претходните докази што го поврзуваат недоволниот сон со пократок животен век и додава дека го смета наодот за отрезнувачки, поради што треба да се посвети повеќе време на тоа. Јоханес вели дека е љубопитен да види дали постои минимално времетраење или фреквенција на недоволен сон што е потребно за значително влијание врз животниот век.
Како да спиете доволно секоја вечер?
За оние кои се мачат да се наспијат добро секоја вечер, Нгаи и Јоханес нудат неколку совети.
Дајте приоритет на спиењето. Ова е првиот чекор кон добивање доволно спиење, вели Јоханес.
„Многумина од нас често го жртвуваат спиењето за разни животни настани – одговорности, должности или само за забава. Оваа студија нè потсетува дека доволното спиење е исклучително важно за нашето здравје, затоа да го дадеме приоритет на спиењето пред другите активности – за нашето целокупно здравје.“
Тој советуваше да се обидете да создадете средина што поттикнува спиење во просторијата во која спиете. Треба да биде тивка, удобна за вас, не премногу ладна или премногу топла и доволно темна. Сето ова придонесува за подобрување на квалитетот и времетраењето на спиењето.
Нгаи вели дека доследноста е клучна и препорачува „да си легнувате и да станувате (будете се) во исто време секој ден, дури и за време на викендите, бидејќи на тој начин ќе го регулирате вашиот внатрешен часовник и циркадијален ритам.“
Тој исто така предлага да воведеме релаксирачка рутина што ни одговара пред спиење. Може да биде читање книга, топла бања, медитација. Сето ова ќе ви помогне да го разјасните умот. Исто така е клучно да внимавате што консумирате неколку часа пред спиење. „Избегнувајте кофеин, големи оброци и алкохол, бидејќи тие можат да ги нарушат вашите навики за спиење“, потсети Нгаи.
И конечно, Нгаи советува да се ограничи изложеноста на сина светлина од електронски уреди како паметни телефони и компјутери најмалку 30 до 60 минути пред спиење.
„Овој вид светлина може да се меша во производството на мелатонин, хормонот што ве прави поспани“, објасни тој. Тој исто така додаде дека „голема пречка за соодветен квалитет на спиење може да бидат менталните болести и прекумерниот стрес, поради што треба да побарате помош од експерти. Подобреното управување со стресот, исто така, ќе помогне во квалитетот на спиењето“, истакна Јоханес.
