Студен бран ќе „го замрзне“ американскиот континент овој викенд

Бран студен воздух од Арктикот што пристигнува во Соединетите Американски Држави овој викенд би можел да донесе рекордно ниски температури, нерегистрирани од 19 век, како и првиот снег во сезоната, објавува „Вашингтон пост“, повикувајќи се на американските метеоролошки служби.

Според прогнозите, екстремно студеното време ќе трае неколку дена, до среда. Студениот бран прво ќе се прошири на рамнините и Средниот Запад, а потоа на Источниот брег во понеделник. Се очекува околу 155 милиони жители да бидат погодени од екстремно ниски температури.

Метеоролозите најавуваат дека температурите ќе паднат значително под просекот за ова време од годината, дури и во јужните делови на САД и во Флорида. Во градот Бруксвил, Флорида, се очекува температурата да падне на само 1 степен Целзиусов, што би можело да го сруши рекордот од 1894 година.

Ненадејното опаѓање на температурите би можело да предизвика невообичаени феномени за оваа клима – како што се замрзнување на игуаните, кои, кога ќе се вкочанат од студот, често паѓаат од дрвјата, наведува „Вашингтон пост“.

За делови од Мичиген, вклучувајќи го и Детроит, метеоролозите го предвидуваат првиот снег во сезоната. Од понеделник до среда, локално обилни врнежи од снег се очекуваат и во државите Охајо, Пенсилванија и Њујорк, додека снежна покривка може да се формира и во градови како Чикаго и Индијанаполис.

Рекордно ниски температури се можни во 13 држави, од Пенсилванија до Флорида. Во Ноксвил, Тенеси, се очекува максималната дневна температура да биде само 2,7 степени Целзиусови, што би го срушило рекордот поставен во 1973 година. Во Хантсвил, Алабама, живата би можела да падне на 5 степени, што би го срушило рекордот стар повеќе од 70 години.

Експертите објаснуваат дека причина за овој остар, но краткотраен студен бран е поларната воздушна струја, која носи леден воздух од северна Канада до јужниот дел на САД. Овој феномен е поврзан со област со висок притисок во близина на Гренланд, што му овозможува на арктичкиот воздух да навлезе длабоко во американскиот континент.