Стопанската комора на Србија (ПКС) го претстави најновиот бизнис-водич за пазарот на Македонија, наменет за сите домашни компании што сакаат да почнат или да прошират бизнис, да воспостават нови партнерства или да истражат можности за извоз и инвестиции. Публикацијата е достапна бесплатно на веб-страницата на Комората и е дел од пошироката иницијатива на ПКС за обезбедување на домашните компании со конкретни, практични алатки за влез на регионалните пазари.
– Инвестирањето во знаење е првиот чекор кон успешна регионална експанзија. Регионот е клучен извозен пазар и поради географската близина, сличната деловна култура, минималната јазична бариера и веќе добрите трговски врски, што ги прави овие пазари идеални за започнување извоз, нудејќи стабилна побарувачка и лесно достапни можности за домашните компании – нагласува Ѓорѓије Радовиќ од Центарот за регионална соработка ПКС.
Водичот за Македонија е четврти по ред, по веќе објавените водичи за Словенија, Хрватска и за Албанија.
– Сите водичи се резултат на долгогодишната работа и на професионалното искуство на тимот на Српската стопанска комора, кој континуирано ги следи деловните трендови и специфики на пазарот во Северна Македонија, но и во другите земји во регионот. Вредноста на овие публикации се огледа во фактот што се создадени врз основа на секојдневната комуникација со компаниите и врз основа на најчестите прашања и дилеми на членовите, поради што претставуваат исклучително корисен ресурс за практично работење – додава Радовиќ.
Најчестите прашања се поврзани со даноците, процедурите за отворање компании, процедурите за инвестирање, јавните набавки, добивањето работни дозволи и со други административни чекори. Целта на ПКС е да биде сигурна и ефикасна услуга за домашната економија, така што компаниите навремено имаат сигурни информации за бизнисот и успешно ги пласираат своите производи и услуги на пазарите во регионот.
Претходните публикации се покажаа како вреден ресурс за српските компании што се стремат да го прошират својот бизнис во регионот и бараат проверени информации за донесување деловни одлуки.
Според податоците за 2024 година, вкупната размена на стоки меѓу Србија и земјите од регионот изнесувала речиси 10 милијарди евра. Од тоа, извозот претставувал 6,4 милијарди евра, што е една петтина (21 %) од вкупниот српски извоз од 30,4 милијарди евра. Овие податоци ја нагласуваат клучната стратешка улога на регионалниот пазар во српската економија. Во овој контекст, регионалната економија не е само можност за раст туку и поддршка за стабилноста на извозната ориентација на Србија.
Центарот за регионална соработка, ПКС, најавува дека наскоро ќе бидат достапни нови водичи за пазарите во Босна и Херцеговина и во Црна Гора, со што ќе се заокружи еден од важните сегменти на поддршка за домашните компании што планираат да влезат на пазарите во околното подрачје.
Сите четири бизнис-водичи (Словенија, Хрватска, Албанија, Македонија) се целосно бесплатни и достапни за преземање во дигитален формат (PDF).
